കണ്ണാടിയിലെ ശരീരം

Nada T. K
Ramjas College
ntk_353@yahoo.com

അലമാരയില്‍ നിന്ന് അടര്‍ന്നുവീണ കണ്ണാടിയില്‍
അംഗവിച്ഛേദം സംഭവിച്ച ഒരു ശരീരം.
വക്കുപൊട്ടിയ ചില്ലിന്‍‌കൂട്ടുകളിലൊന്നില്‍
ആരേയോ തേടുന്ന ഒരൊറ്റക്കണ്ണിന്‍റെ പാതി.
പറ്റം തെറ്റിയ മറ്റൊരു പൊട്ടില്‍
പേടിച്ചരണ്ട മറുകണ്ണ്.
കൈകളില്‍.........., കാല്‍കളില്‍,
കണ്ണുനീര്‍പോലെ പൊടിയുന്ന രക്തതുള്ളികള്‍..
കണ്ണാടിയുടെ മിനുത്ത പ്രതലത്തില്‍
ചെമന്ന ചായം തേച്ച്,
കൂര്‍ത്ത വക്കുകളിലേക്ക് പടര്‍ന്ന്,
പുളഞ്ഞ്,
അടര്‍ന്ന ഓരോ അവയവങ്ങളിലും
ജീവനാംശം തേടി
പേടിച്ചരണ്ട കണ്ണിലേക്ക് ആഴ്ന്നിറങ്ങി
ഉതിര്‍ന്നുവീഴുന്ന കട്ടിയുള്ള രക്തതുള്ളികള്‍...
അപ്പോഴേക്കും പക്ഷെ
പുറം സമാധിയായിരുന്നു.
ആരെയോ തേടിയിരുന്ന ഒറ്റക്കണ്ണ്
പാതിയടയുകയും ചെയ്തിരുന്നു.