തേടുന്നു

(1)

എവിടെ ഈ ഭൂമിയില്‍
നമ്മെ ഒരുമിച്ചുപോറ്റിയ
ഗര്‍ഭപാത്രം?
എവിടെ, വെരുകള്‍,
നമ്മെ ഒരുമിച്ചുചേര്‍ത്ത
മുദ്രകള്‍, രക്തവും?
എവിടെ, ഈ സത്രത്തില്‍
നമ്മെ ഒരുമിച്ചു പാലൂട്ടിയ
വാക്കും സംഗീതവും?
ഞാന്‍ തെടുന്നു; ഇരുട്ടില്‍
ഉറങ്ങാത്ത കറുപ്പില്‍,
ഒടുങ്ങാത്ത വിശപ്പില്‍,
തേടുന്നു.
അന്ത്യമില്ലാതെ തേടുന്നു.

(2)

നാം ഒരുമിച്ചു ജനിച്ചു
ഒരുമിച്ചു കരഞ്ഞു
ഒരുമിച്ചു മുലകുടിച്ചു
ഒരുമിച്ചു പിച്ചവെച്ചു
ഒരുമിച്ചുറങ്ങി.
രണ്ടല്ല, ഒന്നുതന്നെ;
ഒന്നായി തന്നെ.
പക്ഷെ എവിടയാണ് ഞാന്‍?
ഞാനദൃശ്യനോ?
ഞാന്‍ തേടുവതെന്നെ തന്നെയോ?
അറിയില്ല.

(3) ഉത്തരം

ഞാന്‍ നിന്നിലാണ്
നീയാണെന്റെ ഗര്‍ഭപാത്രം
ഞാന്‍ ജനിച്ചതില്ല,
കരഞ്ഞതില്ല, മുലകുടിച്ചതില്ല,
പിച്ചവച്ചതില്ല, ഉറങ്ങിയതില്ല.
എല്ലാം നീ തന്നെ
നീയാണെന്റെ ഗര്‍ഭപാത്രം.
       *
കാത്തിരിക്കൂ അമ്മേ,
ഞാന്‍ ജനിക്കുംവരെ

ഹരി